ஒரே குட்டையில்...

பாசி படிந்த குளத்தில்

வேர்பாவியபடி

பாசாங்காய்ப் புன்னகைக்கிறது

தாமரை!

சேற்றின் நாற்றம்

தொட்டுவிடாதபடி

நம் நாசியில் மட்டும்

வாசனை வீசி

ஒளிர்கிறது!?

இலையுடன்...

ஒட்டியும் ஒட்டாமலும்(!?)

உறவாடுகிறது!

சுல்லெனும் சூரியனோ

சுட்டெரிக்காமல்...

நட்பாய்தான் காய்கிறது!

இதோ!

பாசியில் வழுக்கி

சேற்றில் விழுந்தவற்றின்

சகதி அறிக்கை!

தான் ஆடுவதற்கு

சகதியின் மினுமினுப்பை

வழுவழு தரையென

நம்பி ஏமாந்து

ஆக்கர் வாங்கியபடி...

சாட்டையில்லா பம்பரம் ஒன்று!

தன் அழுகலைச்

சேற்றில்

கழுவிக் கழுவி

மூழ்கி எ(வி)ழுந்தபடி...

சாதி வண்டு துளைத்த

மாம்பழம் ஒன்று!

வெற்றி முரசம் ஒன்று...

ஓங்கி முழங்கி

பராக் வாசித்தபடி!

இன்னுமும் நீளுகிறது

MH-370 விமானத்தின் தேடுதலாய்...

சேற்றில் விழுந்திட்ட

இத்தியாதி இத்தியாதிகளை!

ஒரு கை பார்த்துவிடுவதாய்

பம்மாத்து காட்டியபடி

தாமரையின் கரசேவைக்கு

உதவிக்கரம் நீட்டும்

‘கை’!

எல்லாம்... எல்லாம்...

பாசி(சம்) படிந்த

ஒரே குட்டையில்... !!

-    பாண்டூ,

-    த.க.இ.பெருமன்றம்,

-    6 ஜவுளிக்கடை வீதி,

-    சிவகாசி - 626123.

-    9843610020

கவிக்குயில் கவிஞர் செ.ஞானன் அவர்களின் முதலாம் ஆண்டு நினைவுக் கூட்டம்

சிவகாசி 2014 மார்ச் 9:

தமிழ்நாடு கலை இலக்கியப் பெருமன்றம், சிவகாசி கிளை சார்பில் மறைந்த கவிக்குயில் கவிஞர் செ.ஞானன் அவர்களின் முதலாம் ஆண்டு நினைவுக் கூட்டம் ஏ.ஆர். பிக் லீப் ஆலுவலகத்தில் 2014 மார்ச் 9 ஞாயிறன்று காலை 10.00 மணியளவில் நடைபெற்றது. 

கிளைச் செயலாளர் கனிமொழி கருப்பசாமி அவர்கள் அனைவரையும் வரவேற்றார். விருதுநகர் மாவட்டத் தலைவர் கவிஞர் கந்தகப்பூக்கள் ஸ்ரீபதி அவர்கள் தலைமையில் நிகழ்ச்சி நடைபெற்றது. ஞானன் அவர்களின் திருவுருவப் படத்தை மாநில தலைமைக் குழு உறுப்பினர் முனைவர் பொ.நா.கமலா அவர்கள் திறந்து வைத்தார். மேலும் அன்னாரின் நினைவுகள் பலரால் பகிர்ந்துகொள்ளப்பட்டன.

அதன் தொடர்ச்சியாக ‘கவிக்குயில் கவிஞர் செ.ஞானனின் கவிதை ஆளுமை’ என்ற தலைப்பில் கருத்தரங்கம் நடைபெற்றது. இக்கருத்தரங்கில் ஞானன் கவிதைகள், ஓர் ஊமைக்காதலின் மௌனராகங்கள், இனியது புரிவது வாழ்வு, பாடு குயிலே பாடு, என்ன சொல்லி அழைக்க, சிந்தனை மின்னல்கள், வறுமை ஓரு தடையல்ல, அர்ச்சனைப் பூக்கள், ஒளிகள் மற்றும் தாமிரபரணிக் கரையினிலே ஆகிய கவிதை நூல்களை முறையே கவிஞர் பாண்டூ, ‘இன்று’ பத்திரிகையாசிரியர் ஷாகுல் ஹமீது, சிறுகதையாளர் காளிராஜன், கவிஞர் கலாராணி, எழுத்தாளர் ஸ்வரமஞ்சரி, கவிஞர் சேகர், கவிஞர் இ.கி.முருகன், பேராசிரியர் நயினார், எழுத்தாளர் முத்துபாரதி மற்றும் பேராசிரியர் பொ.நா.கமலா ஆகியோர் சிறப்பாக எடுத்துரைத்தனர். கனிமொழி கருப்பசாமி மற்றும் சேகர் கவிதாஞ்சலி செலுத்தினர்.

இந்நிகழ்வில் சமூக ஆர்வலர் வெ.மகாலட்சுமி, என்.முத்துக்குமார், சாத்தூர் கதைசொல்லி இராம்மோகன், கோவில்பட்டி செம்மைநதிராசா, கழுகுமலை கிருஷ்ணன், நக்கீரன் நிரூபர் சி.ந.இராமகிருஷ்ணன் மற்றும் பலர் கலந்து கொண்டு சிறப்பித்தனர். கிளைத் தலைவர் ஸ்வரமஞ்சரி அனைவருக்கும் நன்றி கூறினார்.

டிடி பொதிகையில் கொஞ்சம் கவிதை கொஞ்சம் தேனீர்...

டிடி பொதிகையில் 'கொஞ்சம் கவிதை கொஞ்சம் தேனீர்' நிகழ்ச்சி ஒவ்வொரு ஞாயிறும் மதியம் 1.30 மணிக்கு நடைபெறுகிறது.அதில் 23-02-2014 அன்று நானும் (கவிஞர் பாண்டூ), கவிஞர் அ.வெண்ணிலாவும் கலந்துகொண்டோம். அதை பாடலாசிரியர் பிறைசூடன் நெறிப்படுத்தினார். அதில் தமிழ், காதல் மற்றும் சமூகம் குறித்தான கலந்துரையாடலும், கவிதையும் படைக்கப்பட்டது. நன்றி.pandukavi16@gmail.com. 

நிகழ்வைக் கான.. இங்கே சொடுக்கவும்... கொஞ்சம் கவிதை கொஞ்சம் தேனீர்

டிடி பொதிகையில் பாண்டூ (PANDU IN DD POTHIGAI...)

டிடி பொதிகை(DD Pothigai) தொலைக்காட்சியில் 23.02.14 ஞாயிறன்று மதியம் 1.30 மணிக்கு, நான் கலந்துகொண்ட ‘கொஞ்சம் கவிதை... கொஞ்சம் தேனீர்’ நிகழ்ச்சி ஒளிபரப்பாகிறது. அந்நிகழ்வை பாடலாசிரியர் திரு. பிறைசூடன் அவர்கள் நெறிப்படுத்த, கவிஞர் அ.வெண்ணிலா அவர்களும் உடன் நானும் கலந்துகொள்கிறோம். தவறாது பார்த்து தங்கள் கருத்தைப் பகிரவும். நன்றி.

 - பாண்டூ@9843610020; www.pandukavi16.blogspot.in; pandukavi16@gmail.com.

http://www.youtube.com/watch?v=O3VEQmz00T0

நான் மனுஷி!

மகளிர்தினச் சிறப்புக் கவிதை

நவம்பர் 27, 2008 இல் 11:20 முப (கவிதை) 

எனது பொறுமை
நசுங்கிக் கொண்டிருக்கிறது
உன் உறவுப் பாறையின்
அடியில்…

மதுவாடை சகிக்க
என் மூக்கு
கல்லால் செதுக்கப்படவில்லை…
மற்றவனின்
புகழ்புராணத்தைப் பொறுக்க
என் காதுகள்
மரத்தாலானவையல்ல…

நானும்
எலும்புகளால்.
தசையால்,
ரத்தத்தால்,
உணர்வுகளால்,
கனவுகளால்,
ஆக்கப்பட்டவளென்பதை
உணர்ந்திருக்கிறாயா நீ?

ஒன்றுக்கு
மூன்று பேரின் உடலை
நீ பகிர்ந்து கொண்டாலும்
ஒழுக்கத்தின்
உச்சியில் நிற்கிறாய்!

நான் உன் காலடியில்
தவம் புரிந்தாலும்
சோரம் போகிறவளாக
சோதிக்கப்படுகிறேன்!

இது
முரண்பாட்டுக் கூச்சல்
மூடர்களின் கூடாரம்
வீசியெறிகிறேன்
இதோ நீ தந்த
மனைவிப்பட்டம்

தாலி, மெட்டி
அடையாளங்கள்
எனக்கெதற்கு….

பயம் உணர்ந்து
உடலை சுருக்குவதும்
உறுப்புகளை
இழுத்துக்கொள்வதும்
ஆமைக்கு உரியது
நான் மனுஷி!

********************

Thanks:http://www.kumudam.com/magazine/Snegiti/2008-11-01

நன்றி : 

https://rammalar.wordpress.com/2008/11/27/%E0%AE%A8%E0%AE%BE%E0%AE%A9%E0%AF%8D-%E0%AE%AE%E0%AE%A9%E0%AF%81%E0%AE%B7%E0%AE%BF/

தாமஸ் ஆல்வா எடிசன் பிறந்தநாள் இன்று..

பிப்ரவரி 11:

 ஒளி விளக்கு, திரைப் படக்கருவி போன்ற பல கருவிகளை உருவாக்கிய தாமஸ் ஆல்வா எடிசன் பிறந்தநாள் இன்று..

தாமஸ் ஆல்வா எடிசன் இளம் வயதில் பள்ளிக்கு வெகு சில நாட்களே போனார். ஒரு நாள் வகுப்பை விட்டு வரும் பொழுது அவரின் பாக்கெட்டில் ஒரு துண்டு சீட்டு இணைக்கப்பட்டு இருந்தது. அதை அவரின் அன்னை எடுத்து பார்த்தார். கண்களில் நீர் முட்டிக்கொண்டது. "டாமி படிக்க லாயக்கில்லை ! வீட்டிலேயே வைத்துக்கொள்ளவும் !" என்று அந்த கடிதம் சொன்னது.

மேலும் படிக்க...

www.thozharjeeva.blogspot.in/2014/02/blog-post_10.html

அறிவியல் புரட்சியாளர் சார்லஸ் டார்வின்

        இயற்கை அறிவியலின் ஆய்வு மேற்கொண்ட சார்லஸ் டார்வின்  1859 நவம்பர் 2 இல் ‘உயிருனங்களின்  தோற்றம்’ (on the ori-gin of species) என்ற நூலை உடனேயே அனைத்து மக்களின் கவனத்தையும் கவர்ந்தது. மேற்குடியினர் வட்டங்களும் இழிசுவை கொண்ட பத்திரிக்கைகளும்  இதைக் காழ்ப் புணர்ச்சியுடன் திட்டித் தீர்த்தன. கிருத்துவத் திருச்சபைகள் சாபமிட்டன. அதே சமயம் அக்காலத்து முற்போக்கு மனிதர்கள் இதை வியந்து பாராட்டினர். காரணம் மனிதகுலம் இயற்கையாகத் தோன்றியதே தவிர கடவுளால் தோற்றுவிக்கப்படவில்லை என்று இவற்றில் கறாரான விஞ்ஞான அடிப்படையில் காட்டப்பட்டிருந்தது. மனிதன் விலங்குலகிலிருந்து தோன்றினான் என்று டார்வின் கண்டுபிடித்ததானது 19-ம் நூற்றாண்டின் பிற்பகுதியில் நிலவிய விஞ்ஞானக் கண்ணோட்டங்கள் மீது பெரும் தாக்கத்தை ஏற்படுத்தியது.

மேலும் படிக்க : http://thozharjeeva.blogspot.in/2014/02/blog-post.html

       வாழ்க அவர் புகழ் உலகு உள்ளவரை !

(09.02.2014 சார்லஸ் டார்வின் பிறந்த நாள்)

கட்டுரையாளர்: ஆர்.பாலச்சந்திரன்,

 தமிழ்நாடு கலை இலக்கியப் பெருமன்றம்,

 விருதுநகர் துணைத் தலைவர்.

தொடர்புக்கு:9486207060

நன்றி : www.thozharjeeva.blogspot.in